بما ان الغالبية هذي الفترة متابع لكأس العالم بقطر ، فاليوم نسولف عن واحدة من التقنيات الجديدة التي استخدمت لأول مرة بهذه البطولة وربما سوف تعمم على باقي البطولات وهي تكنولوجيا تحديد التسلل Automated offside technology .
من ضمن المجالات الفرعية بالذكاء الاصطناعي اكو مجال اسمه انظمة صناعة القرار المعتمدة على الذكاء الاصطناعي ،وهذي فكرتها ننطي بيانات لنظام ذكاء اصطناعي بالزمن الحقيقي ويحلل البيانات وينطي القرار بدقة عالية جدا وبسرعة كبيرة .
هنا الفيفا استعانت ببعض الشركات ورادت تستفاد من الذكاء الاصطناعي بموضوع التسلل لان اغلب اخطاء الحكام تقع فيه ، فأخترعوا حل وهو تكنلوجيا تحديد التسلل الي هي تطبيق من تطبيقات انظمة صناعة القرار .
فكرة هذي التكنلوجيا انو نصبوا ١٢ كاميرا عالية الدقة بسقف الملعب وظيفتها تتبع حساس مزروع بالكرة (بالعراقي الطوبة) وايضا تتبع ٢٩ نقطة بجسم كل لاعب مثلا ( الرأس ، القدم ، اليد ..الخ ) وموقع النقاط بالملعب (خمسين صورة تاخذ بالثانية الواحدة) ، وترسل البيانات لنظام موجود على خادم Server الي بدوره يحلل هذي البيانات ويحدد اذا اكو تسلل او لا ويرسل تنبية وصور الى شاشات غرفة الفار الي بيها حكام يشوفون الصور وينطون خبر لحكم الساحة لهذا تلاحظ دائما يتأخر حكم الساحة بأتخاذ قرار التسلل لان ينتظر النتائج من حكام الفار .
عموما هذي التقنية اثبتت نجاحها وخصوصا في مباراة المنتخب السعودي والارجنتيني وربما تتوسع تطبيقها لتشمل اكثر من التسلل .
وبنفس الوقت ارى زيادة تطبيق التكنولوجيا بكرة القدم تفقدنا متعة مشاهدة مباريات كرة القدم .
مدونة محمد الساعدي 